By Atmo Tan Sidik, 26 September 2022

Dina Jemuah Paing tanggal 23 September 2022, jam sanga esuk, panggonane nang Jalan Puter Gang Pipit Nomer 5, RT 09 RW 02 Kelurahan Randugunting, Kecamatan Tegal Selatan, Kota Tegal, ana wong mantenan sing ijab kabule nganggo basa Tegalan. Ora mung kuwe tok, sawise Ustad Ismail Halim Ar-Rasyid maca al-Quran, surat al-Fatihah, ar-Rum ayat 21, karo ar-Rahman ayat 25, sari tilawahe sing diwaca daning Nabila Arifani Arizka, nganggone basa Tegal. Semono uga sing mein ular-ular Kang Kaji Dr. Ir. Abdul Fikri Faqih, M.M, Wakil Ketua Komisi X DPR RI, nganggo basa Tegal.

Mulane, jare petugas sing Kantor Urusan Agama Kecamatan Tegal Selatan, Pak Saat karo Ustad Imam Haromain, keadaan kiye kayong tembe ana lagi deweke njawab pitakonane wartawan nang bab mantenane Mas Muhammad Ibadurrahman bin Rahmat Rahardjo karo Mba Siti Hanifah binti Suwarto. Nganggo basa Tegal, jarene tetep sah. 

Sawulan sadurunge ijab kabul, Mas Ibad sing umahe nang Jalan Branjangan nomer 33 Kecamatan Tegal Barat, pancen wis silaturahmi maring Ustad Ahmad Ridho Athori sing saben dina Senen bakda solat subuh ngisi pengajian nang Masjid Agung Kota Tegal nganggo basa Tegal. Deweke pancen ngati-ngati, aja nganti nyalahi neng bab adab. Deweke teka njaluk diwarahi cara-carane ngucapna ijab kabul, malah uga disakseni daning Ismail Halim Ar-Rasyid.

Kang Kaji Fikri Faqih jebule jujur ngakoni yen ular-ular utawa khotbah nikah nganggo basa Tegal kuwe luwih angel tinimbang nganggo basa Indonesia. Mulane deweke njaluk pangapura karo kabeh sing teka, utamane karo brayah sing lagi walimah mbokan anggone ngomong, tronyak-tronyok, dianggep nrokcok, utawa dianggep sakepenakeng boyok. Tapi jebule, kesane wong sing pada ngrungokaken khotbah nikahe, jebule akeh sing seneng, pada mesem-mesem, cekikikan. Keadaan sing kaya kuwe ndadekaken bungahe keluarga penganten, apa maning Mas Ibadurrahman tembe ditinggal mati bapane sing arane Rahmat Rahardjo, S.E., M.Pd, anggota Komisi I DPRD Kota Tegal lagi dina Kemis Wage, tanggal 11 Agustus 2022, jenazahe dimakamaken nang Kelurahan Pesurungan Lor, pereke kantor kelurahan nang komplek kuburan Mbah Imam Hambali.

Kanggone Mba Siti Hanifah, penganten wadon, lagi waktune diijabna langsung daning bapane, Drs. Suwarto, uga lagi mriyang utawa nandang lara. Tapi, alhamdulillah, lagi deweke nikahaken putrine, kegolong lancar. Mulane, pas waktune ndonga, K.H. Amiruddin Zawawi saliyane ndongakna penganten loro, uga ndongakaken Pak Suwarto endah cepet waras, sehat wal afiyat, uga ndonga kanggo almarhum Rahmat Rahardjo bin Nuchi muga olih maghfiroh saka Allah subhanahu wa ta’ala. Uga ndongakna Khonsa Zuhaida uga Ismail olih jodoh sing soleh-solihkah.      

Dadi, kabeh apa sing diusahakaken daning keluarga Ibu Erni Ratnani, S.E., M.M alias ibune penganten lanang, karo sakbrayahe nduweni tujuan mulya, endah adat utawa basa Tegal bisa dipertahanaken. Kaya apa sing diaturaken Rektor Universitas Bhamada Slawi, Kang Kaji Dr. Maufur Marghub Abdul Aziz, M.Pd, tujuane ora nana liya supaya bocah-bocah enom sing luwih kondang kasebut generasi milenial, gelem nganggo basa daerahe, sebab manfaate gampang nggo nyambung paseduluran, sing utama lamon omong-omongan ngobrol nganggo basa Tegalan kuwe kayonge ora duwe perasaan kementhus, sebab nang daerahe dewek kuwe ana pesene kamituwa, “lamon sombong kayong ora weruh sing nggeyong, lamon kadiran kayong ora weruh empere wong esih pada bae wong Tegale”. 

Muga-muga, penganten loro sakaluwargane dadi barokah dunya akherat. Kaya wangsalan sing ditembangna Kang Kaji Fikri: “suket jepang dienggo nambani, nek disawang tambah ngangeni, tambah ngangeni, tuku jambu keliru randu, I love you kepadamu”. Sapisan maning, Kang Kaji Fikri pesen kuwe nang Surat Ar-Rum ayate dudu mung mawadah, tapi ana warohmah, dadi dudu mung cinta/demen tapi ana warohmah, yakuwe tresna. Senajan mengko waktune wis tuwa, kulite wis mlitut, tetep brayan ngelingi janji waktu mantenan. Wis, kanggo liyane, ora usah isin niru hal sing apik waktune ijab kabul, sari tilawah, ular-ulare, protokol utawa MC-ne, sukur pakean adate, panganan utawa jajan sing disuguhnane nganggo serba Tegalan.  (*)